Коронавирус туралы аңыздар

Коронавирустың штаммы Қытай елінде жылдам таралып жатыр. Ал ол туралы аңыздар әлемде одан да жылдам жайылуда. Оны ас содасының ерітіндісімен және Бань Лань Гэнь шайымен емдеуге болады дейді. Сонымен қатар банан арқылы және «Алиэкспресс» арқылы алынған сәлемдемелер арқылы жұғады-мыс. Бүгінде кеңінен тарап кеткен аңыздарға тоқталып өтейік.

·  Уатсап желісі арқылы «Кеше 23 адам n7n9 вирусын жұқтырып, одан көз жұмды. Дәрігерлер банан сатып алмауға кеңес береді. Өйткені ол банан арқылы жұғады. Бұл хабарламаны тез арада тарат» деген сынды хабарламалар тарап кетті. Алайда Қытай және басқа елдің бір де бір сарапшысы бұл вирустың таралуын банан немесе басқа жеміспен байланыстырған емес. Одан басқа, бұл сынды хабарламаларда вирустың штаммы қате жазылған. 2019-nCoV штаммы ауа-тамшылы жолмен адамнан адамға жұғады. Вирус адам немесе жануар ағзасынан тыс ұзақ өмір сүре алмайды.

·  «Алиэкспресске» келсек, бұл да шындыққа жанаспайды. Өйткені жоғарыда айтылғандай, вирус тірі ағзада ғана өмір сүріп, дами алады. Ал затқа вирус тиген жағдайда да, ол сәлемдеме баратын жеріне жетем дегенше вирус өледі.

·  «Әйелдер мен балаларға қарағанда ересек ер адамдар коронавирусқа шалдығу мүмкіндігі жоғары екен. Сондықтан күнде кешке 250 грамм спирттік ішімдік ішіп тұруы керек. Бұл құпия ақпарат» деген хабарлама шындықтан гөрі әзілге жақынырақ. Алайда Ухань тұрғындары, әсіресе егде жастағылар бұған сенеді екен. Ал шындығына келгенде, алкоголь керісінше, ағзаны әлсіретіп, вирусқа бейімдейді. Сарапшылар спирттік ішімдікті ішуге емес, қолды дезинфекцияла үшін пайдалануға кеңес береді.

Еске сала кетейік, коронавирустың алдын алудың бірден бір жолы – ол гигиенаны сақтау.

Шаттық Бітімбаева

№2 ЖҚЕ эпидемиологы