СИНТЕТИКАЛЫҚ ЕСІРТКІ – ҚОҒАМ ДЕРТІ

2020 жылы Жаңаөзенде есірткіқұмарлар саны 131, оның ішінде көктамыр арқылы қолданатындар саны – 72 болған. Биылғы мәліметке сүйенсек, есірткі қолданушылар 93, ал көктамыр арқылы қабылдайтындар 60-ты құрап отыр. Бұл статистика осы санаттағы адамдардың едәуір азайғанын көрсетеді. Дегенмен, қуануға ерте дейді мамандар. Себебі дәрігер қабылдауына келіп, емделудің жолын іздейтіндер шамалы. Тіркеуде жоқ нашақорлар қанша? Мұны ешкім дөп басып айта алмайды.

Бүгінде синтетикалық есірткінің тез таралуы қоғамның ең үлкен қаупіне айналып отыр. Себебі бұл препарат түрінің еркін саудасы, жаңа түрлерінің пайда болуы, ғаламтордағы мәліметтердің ашықтығы, «синтетиканың» жарнамасы жалт-жұлт еткен сан түрлі сайттарға бақылаудың жоқтығы – осының барлығы онсыз да күрделі мәселені ушықтырып келеді. Осы тұрғыда психолог маман жасөспірімдермен ата-анасы жақын қарым-қатынас орнатып, оларды үнемі бақылауда ұстау қажетті айтады.

Болары болып, бояуы сіңген қылмысты әшкерелегеннен гөрі, оның алдын алған өте маңызды. Сондықтан қазір синтетикалық нашақорлықтың таралуы, интернеттегі оның жарнамасы мен саудасына қоғам болып бірлесе қарсы тұрып, жастар арасында түсіндіру жұмыстарын ұйымдастыру маңызды дейді наркологтар.

Қазіргі таңда мемлекеттік наркологиялық орталықта 18 264 адам тіркеуде тұрса, оның 104-і – кәмелетке толмаған жеткіншектер. Бұған бір себеп – есірткі қолданудың жастар арасында «сәнге» айналуы. Қазір қыз-келіншектер арасында да есірткі қолданушылардың қатары күрт көбейген. Сондықтан аталған дертке итермелеп, жарнама жасайтын қылмыскерлерді тұзаққа түсіру - кезек күттірмес мәселе екені айдан анық.