Биыл Маңғыстауда «Аңсаған сәби» бағдарламасы арқылы 135 нәресте дүниеге келді 

Биыл Маңғыстауда «Аңсаған сәби» бағдарламасы арқылы 10 айдың ішінде 135 нәресте дүниеге келді, деп хабарлайды Қоғамдық коммуникация орталығы облыстық денсаулық сақтау басқармасының баспасөз қызметіне сілтеме жасап.

- «Аңсаған сәби» арнайы бағдарламасы бойынша Маңғыстау облысына 2024 жылға 273 квота бөлінді. Оның 235-іне жолдама берілді. Бүгінгі күні 196 әйел эко орталықтарға жатқызылды. Ал, 38 әйел эко орталықтарға баруға дайындалып жатыр. 10 айдың ішінде 135 сәби дүниеге келді. Аталған бағдарлама арқылы көмек алу үшін алдымен емханаға есепке тұрып, «Жанұяны жоспарлау» орталығынан толық тексеруден өтуі шарт. Соның нәтижесі бойынша «Аңсаған сәби» бағдарламасына қатыса алады, - деді Маңғыстау облыстық денсаулық басқармасының штаттан тыс бас репродуктолог маманы Юлия Досаханова.

Айта кетейік, міндетті әлеуметтік медициналық сақтандыру аясында экстракорпоралды ұрықтандыру әдісін жылына бір рет тегін жасатуға болады.

Биыл Жаңаөзенде бағдарлама шеңберінде 9 сәби дүниеге келген.