ЕМХАНАҒА ИММУНОЛОГИЯЛЫҚ АНАЛИЗАТОР АЛЫНДЫ

Жаңаөзендегі №2 емханаға жаңа иммунологиялық анализатор алынды. Бұл мұнайлы қаладағы алғаш заманауи аппарат. Мұндай құрылғы өңір бойынша тек Ақтау қаласында бар. Анализатордың атқаратын қызметіне келер болсақ, зертхана мамандары онымен науқастардың гармондарын зерттейді. Яғни, қан талдауы арқылы жыныс безі, ұйқы безі, бүйрек үсті безі, қалқанша безі гармондарының қызметін, олардың санын осы анализатормен анықтайды. Бұрын емхана осы анализдерді анықтау үшін жеке зерттеу клиникасына жүгінетін болса, енді барлығын бір емханада атқара алады.

Сонымен қатар, анализатор арқылы инсулин, картизол, кальцитонинді тексеріп, дәрумендердің көрсеткішін біле алады. Құрылғы 1 адамның анализін 12 минутта шығарып беруге қауқарлы. Бір мезгілде 60 талдаманы игереді. Бұл емделушілердің уақытын үнемдеп, медицина қызметкерлеріне нақты нәтиже шығаруға мол септігін тигізуде.

Емханаға осыған дейін гематологиялық, биохимиялық және несеп анализаторлары алынған болатын. Бұдан өзге ультрадыбысты зерттеу, ЭКГ жабдықтарымен қамтылып, тұрғындарға көрсетілетін қызмет сапасы артуда.